Ayatullah A’arafi Ya Bukaci Malaman Duniyar Musulmi su Ƙara Nuna Haɗin kai a Wannan Lokaci na Tarihi

A wata tattaunawa da Kamfanin Dillancin Labaran Hauza, Hujjatul Islam Wal Muslimin Hussaini Kouhsari ya bayyana cewa waɗannan wasiƙun godiya sun kasance ne ga goyon baya da matsayai da manyan malamai masu tasiri a duniyar Musulmi suka nuna bayan harin da Amurka da gwamnatin Sahyoniyawa suka kai wa Iran, wanda ya jawo shahadar jagoran al’umma da kuma kashe fararen hula marasa laifi. Ya ce Ayatullah A’arafi a cikin saƙonninsa ya buƙaci malaman duniyar Musulmi su ƙara bayyana haɗin kai tsakanin malaman Musulmi da na sauran addinai a wannan muhimmin lokaci.

Ya ƙara da cewa Ayatullah A’arafi ya bayyana a cikin wasiƙunsa cewa girma da zurfin wannan laifi ba boyayye ba ne ga masu basira. Nufin kai hari ga babban marja’i na addini, mafakar ‘yan Shi’a, jagoran addini kuma mafi girman jami’in siyasa na Jamhuriyar Musulunci ta Iran, tare da kashe yara da fararen hula marasa kariya da kai hari kan muhimman kayayyakin more rayuwa, wani bala’i ne da ba a taɓa ganin irinsa ba wanda ya take dukkan ƙa’idoji da dokokin ƙasa da ƙasa.

Mataimakin sashen hulɗa da ƙasashen waje na Hauzozin ilimin addini ya ƙara da cewa Shugaban Hauzozin na Ilimin Addini ya rubuta wa manyan mutane na ƙasa da ƙasa cewa mu a Hauzozin ilimi da al’ummar Iran muna cikin baƙin cikin rasuwar jagoranmu abun ƙauna da kuma yaran wannan ƙasa marasa laifi. A cikin wannan babban rashi, idanun al’ummar Iran da Musulman duniya sun karkata ga malaman addini a ko’ina cikin duniya domin su taka rawar tarihi ta hanyar matsaya mai hikima wajen kare rayuka da martabar malamai da kuma kare tsarkin rayuwar yaran al’ummar Musulmi.

Hussaini Kouhsari ya kuma bayyana cewa a cikin waɗannan wasiƙu an gode wa malaman da suka nuna goyon baya da matsaya, sannan an roƙe su da su isar da wannan ƙarar zalunci zuwa ga duniya baki ɗaya, fiye da iyakokin addini, mazhaba da kuma ƙasashe.

Har ila yau ya ce Ayatullah A’arafi a cikin wannan hulɗar ta wasiƙu ya bayyana cewa wannan hari ga martabar marja’iyya da shugabancin addini gaba ɗaya barazana ce wadda babu wani addini da zai tsira daga sakamakonta. Ya kuma nuna fata cewa ta hanyar Allah wadai da waɗannan laifuka cikin ƙarfi da a bayyane, haɗin kan malaman Musulmi da na sauran addinai zai ƙara bayyana a wannan muhimmin lokaci na tarihi.